晴天也要分手

今週最终清倉6098,可惜仲有3913同6677,夠果斷斬晒就唔駛捱星期中的跌幅。

恒指連跌4天，倉內兩隻收息股相繼創新高後，最後今天都顶唔住，另一隻非持股聯通在績後狂插，今天還砌低9巴仙，很久沒有掂條50天線，不知道會否低表強板塊最後跌？還是個市下试低位的訊號，拭目以待。

電訊三寶上次提及像941較強，62蚊個位守得几靚，隻728未派業績前都頂得吓，關鍵是派息及其他業務發展如何，雲、AI 及派息比率有几高。都會左右股價的發展，跌幅計以移動今天最硬淨。

業績股中，隻佐仔几如，分散業務做得几好，現價今次派息都有7厘几，中東、東南亞業務發展成為增長之一，以可抵銷香港及內地業務的不濟。

大市反弹8000，回2000几，再彈一弹，又插仟几，策略上很難說服是牛市誕生。

近排傾向買低估或搏央企國企重估，有息派又悶嘅買得落得返基建股，心水是中交及鐵建，隻中冶舊年買過又是反艇之作，派息一般般。

談戀愛與陣痛

對上一次發文，已經是一個多月前，今次再貼文純粹想奉勸大家跟股票談戀愛的代價。話說隻龍頭物管昨天發出盈警，预計剩利潤會下跌五成以上，下跌原因不是生意少咗而係因為過往因收購有關的商譽減值及疫情相關開支增加。

金水曾發文管理層減持及在20蚊以上配股可能巳預视業績麻麻，可惜沒有真正去行動，17個几走去入返几手，最後下場下星期便揭鐘，我相信管理層有可能在業績發佈後有機會在低位增持。現價計PE 會升到廿几倍以上，暫時睇物管投機風險及回報並不值搏。早兩星期隻6677都增在高位徘徊，但最近巳落翻晒，另一隻央企817盈喜都冇料，相信無論民企、央企都未得知金垂青，買得預咗要坐，暫時睇可能得隻3316較稳陣？利申金水並沒有持貨！

近排當炒板橋以電訊及AI較好，港股AI概念較多人注意有美圖同百度，電訊股以馬交王的持股較劲，據聞兄台有齊三大加552,近排收錢應該手軟，金水得隻728,本來見隔離品題552在三蚊以下都想買D，可惜D蟹貨物管散唔去，睇势隻552有機會上4大元？ 三隻電讯中隻728響4蚊至4.2D位顶顶地及有短期见顶的趨勢，但成交計僅次於941,若睇圖金水的Nursery 班级能力覺得728的勢在三隻中較強？因為728巳經上返2018年附近的密隻區，其餘兩大還未到，可解讀為728較強勢？

兩會常常炒基建股，杜拜梁提個隻建築超多曝光率，美中不足是息率略低。

大市在插二仟點後迎來800點反弹，美金強弱及美債左右資金進出，今年開局以來中國股市整體表現優於港股及美股，收息股如本地銀行、資源及電讯股表現不錯，倉位內缺乏以上選股可能會較波動及回報較差。

跟大市及美息走向的生物科技像跟大市反弹，生物科技如沛嘉、雲顶及康方也可能有一搏之理。

迷迷糊

年初開局像氣勢如紅，點知北水一回來就上映賣座電影「滿江紅」，金水過年後都暫時多做多錯！買了3968 賣出6098，但加倉3913同遠洋都冇咩甜頭，這個操作邏輯上有點奇怪，減一部分物管又走去加倉第二隻，這不是金水高追中伏，上星期其實想忍手,覺得北水回應繼續升，點知星期一夾咗一吓就連插几天，上星期買嘅招仔都输8%，神針話齋，高追隨時中伏!應晒，北水回來後內房、物管、內銀、內險都弱，似乎未係時候去搏，未來數週可能有物管盈警，但現在國企及央企都較當炒，越秀服務，中海物業都在高位，批民企就多數見一個月或十天低位。是否追高或去低飛批民企物管就考大家眼光。

暫時睇去年第四季的強勢板塊醫藥及生物板塊未散，今週批醫療設備如沛嘉、啟明、心通都有走勢，值搏率記沛嘉招股價在15蚊附近，心通的招股價也是雙位數，但稳陣計沛嘉以公佈營收顯著增長，另外853微創由低位巳回升不少，基本上生科板塊都唔少得，若想有意外收穫，堆B仔股應該還有很多想像空間。

資源股近排金屬都有升勢，買金、銀、銅、鋁要睇買邊個工業或產業錬相關，電動車業績像不錯，帶動埋一眾概念股都拉上來。

生物醫療中曾提及的生殖相關股今週有睇頭，物別細市值個值升得更多，輔助生育長遠睇應該有作為，一方面人口老化，生育率下降，有可能遲D有機會有更多出台措施，提咗好耐都未買。

隨筆

新正頭跟大家拜年! 祝各位今年回報兔氣揚眉，倉位能賺到盆滿砵满。

除夕前沒有北水下企稳二萬二收，可以有不同解讀方法，成交低下都能企稳實屬好現象？ 很多人都擔心大市像過去兩年在春節後衝高見頂，跟住向下插，但我倾向較樂觀，因為今年主要炒復常及疫情受控(變風土），所以應不像去年第五玻疫情般惨，俄烏戰爭已過一年，雖然對全球供應鍊造成巨大影響，但所產生影響也需要適應。

昨天出尖沙咀行，發覺名店及金飾店雖不像過往人多，但起碼也有人氣，相信若實施免檢疫全面通關，本地零售及餐飲股應再有機起動。

金水傾向睇個股表現多過大市。很久沒有聽電台節目财經節目，原來數字叔應為現在市牛一，金水都冇咩頭緒，只是坊間原來有人認為大市巳轉咗角。由於去年失地甚多，今天打算不敢太冒進，所選板塊可能較去年大路:內銀及內險。

內銀考慮3968 及中信銀行，因業績較以预期佳（大行聲稱），內險考慮2628同2318。聽落是否不太開胃？

進取之選可揀生科股如1951, 雖然輔助生殖補贴不太sexy, 但第一次人口增長出現負數，起碼被打壓機會較低，醫療板塊最怕集採及行政措施，最近配咗股，又安全一點。同樣是辅助生殖概念有貝康，市值及成交都細好多，動作唔少，一樣被炒上。

生物科技還有雲顶及再鼎可以睇睇。

温馨提示？

龍頭物管總裁及管理層相繼減持，另類盈警？

上星期持股公司跟某投行有會議，據報下調今年盈利預測，消息傳出後股價即刻應聲下插。

上月底總裁減持咗接近兩球貨（約二仟几萬貨

），跟住執董於20几蚊減咗半球貨。執董出貨價是否具参巧價值很難講，因為於9個几也曾減持過，公司澄清純因為個人原因減持。但總裁減持更具指標性，因為曾在高位60几蚊減持過，接近公司上市高位，不難令人有點是否也要跟車？加上盈利指引下調，相信有可能要捱一排價，金水有意清倉，轉去萬物云或者新華保險。

同時民企物管除以上提及的公司外，已清掉3319,剩下3913同9928,另外换入咗6677。回標轉去國企物管多一點。

另有意選多隻生物科技或醫美概念的股，曾跟進過的雲顶及榮昌反彈很多。 

高息民企及央企可考慮資源相關公司？

除內險外，內銀都可以考慮？

新年隨筆

今週紅盤，基本中美兩邊走出不一樣的行程，東升西降，希望不是霎時間的亢奮。有說法是去年十月急跌很多基金減倉，造成十二月長假前的一些強板塊繼續延續強勢，今週強板塊有很多，追貨意欲像不差，成交只是中中地，未見很大成交，仟柒億最多，但個別板塊較強的不少：醫美概念如牙科、頭髮、矯視乜都得，本地兩隻美容醫療都不錯，可惜金水並非有耐性之人，所以醫思升這噚食唔到。

復常概念，內地餐飲毛毛同呷哺都不俗，酒巴司都有旭旭吓，金水沒有買。另一較強板塊必定數綠電，金水輸到反艇隻2380延續上年強勢，較黃出時升咗一蚊，全綠電如風能、光伏今天都爆埋，大唐新能源、信義能源，風電916升咗好耐，搞到金水氣咳，睇住9.3上到11,都係得個睇字，上年輸到破咗胆，未起得返身。

醫療板塊除醫美外製造藥企都有資金關注，醫藥外包CRO隻龍仔及明藥都升得好劲，但這批股PE 高，高息環境下應不利，不知道是否基金在補倉。

內房板塊繼續吹暖風，未算真轉勢，要認真寫可寫另一篇，十二月公佈全年銷售數字巳經大洗牌，昔日三甲得返隻2007,創仔銷售得仟零億，國企內房趁勢投地及執平貨，整體內房肯定國進民退，銷售數字吸到金水睛是濱江、同合景，引申關連物管可能不差，另外金水觀察到隻中海物業開咗4陽，似乎基金買到係買稳陣，下週有機會執倉，再更新。

隨筆

 博客基本停寫几個月，基本上惨況自年初開始一路拾級而下，恒指至執筆時大約下跌兩成，倉位跑輸恒指四成，可想而知是多麽的慘烈。

所以都冇咩推動力去寫，今次再執筆純想寫下年對投資的初步概念，今年的回顧有機會再寫，因為基本老散會犯的錯都錯齊：不當使用槓桿，向下溝貨，過度集中持股（揀錯板塊），不注意大市轉向，轉身不夠快……數之不盡，基本上有些錯誤是不應該犯也都犯了。教訓是用真金白銀買，希望引以為鑑，也可以為自己揾藉口，今年巳是第三年大市向下調，也都是百年雖得一遇：俄烏戰爭，新冠疫情，內地樓市下調，滯脹……，你若問我巳以上每項對股市相關度有多大，我也不知道，但純揾藉口罷了。

回說下年展望，通關概念，創新葯企，內地消費股，去年狗股……

通關概念可以有不地的股份或週邊地區相關，本地相關巳相繼跑出，如1997, 另外隻友邦未來通關後可接多些單也較強，本地醫美的完美醫療及醫思也有概念，週邊概念如濠賭股，不過要復甦還要一段時間，咁啱疫情又爆，不過就算爆相信也會有賭客，不過買金沙定銀娛好睇你睇好咩場收入及非搏彩收入邊瓣多D，睇勢沙仔如似好過銀仔，沒有深入研究。

內地消費股可選板塊很多，如體育用品，餐飲，地產都有人認為可歸類為消費，地產相關板塊也是金水輸得多的板塊，有跟開此博客的人都知我偏愛物管，正是這個原因今年輸得好甘，包括就算代建中原建業，最高近3蚊邊也有，下路溝到個几，最後個几頂唔住斬晒，最近隨地產相關板塊反彈，建業系上個月有河南省政府支持。現時房地產板塊現時民企睇融資的能力：碧桂園、新城、美的等像有轉機。雅居樂似乎還努力緊……

內房相關的物管視乎收入結構及外拓能力，我手上有合景悠活、碧桂園服務、時代鄰里、雅生活，買上大部份是在反彈高位，碧服最厲害是由25蚊揸到6個几冇走，但反彈浪中沒有把握加貨，被2007減持後股價浮沉在18至20區間，炒波幅一流。手上物管3913及3319兩隻，現價計估值不高，3913有部分物業是商業項目包括商場，商業類為主的物管有1209，星盛商業，卓越商管，寶龍商業等，純商場為寶龍，商厦卓越較多，3913去年大量收購後在管面積巳接近中等物管，市值及收入計向上應還有空間，2.3至2.4較大阻力，3319最大賣點是估值不高，不過關連公司財政狀況似乎未掂，久不久有機會就減持，唯一對股價短期有壓力。9928純炒，關連公司財政困也是風險因素，投機味較濃。

生物科技可炒底有一堆，現在揸緊隻康方生物，最近籍好消息由36急炒上42附近輾轉回落至40蚊邊唔落，若合作項目落實應還有空間再上，金水沽個位唔靚，趁機會想38至40左右補貨。

消費股可考慮啤酒，奶粉，餐飲，暫時未有頭緒買乜。

近排熱炒板塊的教育股，特別高教股的舊愛1890中國科培，仲有另一隻382中匯集團。兩隻近排成交以1890較暢旺，以前382較當炒，基金爱股，但自從公佈業績改變派息政策後，股價冇咁當炒，相反1890近排成交異常暢旺，昨天還過億成交，合理推斷有基金進場？

還有互聯網平台股，阿里健康、京東健康都可以考慮。

現時持倉：

728 6098 3319 3913 9928 2158 9926